ҚМДБ Төрағасы, Бас мүфти Наурызбай қажы Тағанұлының тапсырмасына орай, мүфтияттың 35 жылдығына байланысты «35 мың азық-түлік себетін тарату» қайырымдылық марафоны Қарағандыда жалғасты. Қасиетті Рамазан айында бұл игі бастаманы Қарағанды обысының бас имамы Естай Айтуғанұлының қолдауымен облыстық «Зекет және қайырымдылық» қоры ұйымдастырды. 

Қарағанды облысында қайырымдылық іс-шарасы ҚМДБ бекіткен «Рамазан сыйы» аясында, «Әнет баба» мешітінің жамағаты және демеушілердің атсалысуымен азық-түлік себеттері таратылды. Рамазан айының алғашқы кезеңінде Қарағандыда 750 отбасыға қажетті азық-түлік жеткізілді. Игі бастама бір реттік емес, қасиетті ай бойы жалғасып, облыс көлемінде өзге де мұқтаж жандарға көмек көрсетілмек.

Азық-түлік себеттері тұрмысы төмен отбасыларға, мүмкіндігі шектеулі жандарға көп балалы және аз қамтылған отбасыларға таратылды.

Қайырымдылық – Рамазан айының ең басты құндылықтарының бірі. Дін өкілдері бұл бастаманың ел аумағында кең көлемде жүргізілетінін және мұқтаж жандарға көмек беру басты міндеттердің бірі екенін атап өтті.