Республикалық «QAMQOR-SHARAPAT» орталығының Қарағанды облысы, Шахтинск қалалық «Нұр» мешітінің жанындағы бөлімінің ұйымдастыруымен өңірдегі мешіт қызметкерлері мен еріктілердің қатысуымен «Өткенге құрмет – тіріге міндет» атты зираттарды тазалау іс-шарасы өтті.

Игі бастаманың мақсаты – бабалар рухына құрмет көрсету, жастарды қайырымдылық пен жауапкершілікке баулу, сондай-ақ қорымдарды күтімде ұстау арқылы ислам әдебіне сай сауапты істерді жүзеге асыру болды.
Іс-шара барысында қатысушылар зираттардағы қоқыстарды жинап, айналаны ретке келтірді, қараусыз қалған бейіттерді тазалады. Белсенділік танытқан мешіт қызметкерлері мен еріктілер бірлесе еңбек етіп, туған жерге деген сүйіспеншіліктің және ата-баба аманатына деген құрметтің жарқын үлгісін көрсетті.

«Өткенге құрмет – тіріге міндет» жобасы – ата-бабалар рухына тағзым етумен қатар, кейінгі ұрпақты ұлттық тәрбиемен сусындатудың маңызды бір бағыты. Ізгілікті іс-шара алдағы уақытта да тұрақты түрде жалғасын табады.

Іс-шара соңында «Нұр» мешітінің бас имамы қатысушыларға алғыс білдіріп, марқұмдардың рухына Құран бағыштап, елімізге амандық, халқымызға бірлік тіледі.

ҚМДБ Қарағанды облысы өкілдігінің баспасөз қызметі