Қарағанды облысы,Саран қалалық мешітінде<<Қоршаған орта-Аманат >> тақырыбында жұма уағызы өтті. Уағызды облыстық «Әнет баба» мешітінің наиб имамы Хумар Қоныскерей жүргізді.

Алла Тағала барша жаратылысты хикметпен, тәртіппен және белгілі бір жүйемен жаратқан. Сол жүйенің маңызды бөлігі — қоршаған орта: ауа, су, жер, өсімдіктер мен жануарлар. Бұл-Раббымыздың бізге берген аманаты. Алла Тағала қасиетті Құранда былай дейді:
«Жер жүзінде бұзақылық жасамаңдар»
(Ағраф сүресі, 56-аят)
Бұл аят табиғатты ластамау, бүлдірмеу, теңгерімін бұзбау туралы бұйрық. Қазіргі замандағы экологиялық апаттар-осы бұйрықты елемеудің салдары.
Пайғамбарымыз Мұхаммед (с.а.у) табиғатты қорғауға ерекше мән берген.

Бір хадисте:
«Егер кімде-кім бір ағаш ексе немесе егін ексе, одан адам, жануар немесе құс жесе, бұл оған садақа болып есептеледі»
(Бухари, Муслим)
Бұл хадис табиғатты қорғау-тек экологиялық міндет емес, сонымен бірге сауапты іс екенін көрсетеді.
Қоршаған орта — Алланың бізге берген аманаты. Аманатқа қиянат жасау — ауыр күнә. Сондықтан табиғатты қорғау — дініміздің бір бөлігі. Біз Жаратушыға және болашақ ұрпаққа жауаптымыз.

Алла Тағала жүрегімізге иман, санамызға жауапкершілік, табиғатқа деген мейірім нәсіп етсін!

ҚМДБ Қарағанды облысы өкілдігінің баспасөз қызметі